02.05.2026
Журналист Миләүшә Ҡыҙрасова кейемгә биҙәк төшөрөү буйынса оҫталыҡ дәресе үткәрҙе.
Ул Матбуғат йортоноң унынсы ҡатында үтте. Был урын үҙе бер изгелек үҙәгенә әйләнгән: ғәҙәттә, бында яугирҙар өсөн маскировка селтәрҙәре үрелә, сәксәк бешереү, туҡмас киҫеү өмәләре ойошторола. Оҫталыҡ дәресенә килеүселәр ҙә изге ғәмәлдән ситтә ҡалманы — селтәр үреүгә лә үҙ өлөштәрен индерҙе.
Был сарала Өфөнән генә түгел, ә махсус рәүештә Борай һәм Өфө райондарынан килгән ҡунаҡтар ҙа ҡатнашты.
Миләүшә Сәлим ҡыҙының күркәм бер йолаһы бар: уның дәрестәрендә һәр ҡатнашыусы йәшел төҫтәге футболкаларға ҡурай һүрәте төшөрә. Һуңынан был футболкалар яу яланындағы егеттәребеҙгә ебәрелә.
Күңел ялына әүерелгән сарала «Тамаша» журналына яҙылыусылар араһында бүләктәр уйнатылды, күмәкләшеп сәй ҙә эстеләр.